Irakasle ikasketetako ikasle guztiei bezala, guri ere eskola batetan praktikak egitea tokatu zaigu eta jadanik aste bat igaro da praktiketatik Eskoriatzara, unibertsitatera bueltatu garenetik.
Ni Eskoriatzatik kilometro gutxitara dagoen Aretxabaleta herriko Kurtzebarri eskolan egon naiz eta nire praktika garaiko ordu gehienak 3.mailako 17 ikasleekin eta euren tutorearekin pasatu ditut. Oso gustura egon naiz eta sentsazio onarekin atera naizela aitortu beharra daukat.
Lehenik eta behin, ikasleen jarrera goraipatu nahi nuke. Hasiera-hasieratik hartu ninduten beso zabalik eta nik eurei ahal izan dudan neurrian lagundu diedan bezala lagundu edo tratatu naute bi hilabete hauetan zehar. Tutorea ere oso ondo portatu da nirekin eta hori eskertzekoa da oraindik ondo ezagutzen ez duzun mundu berri batean sartzerakoan, irakasle paperean hain zuzen ere.
Bestalde, oso egokia ikusten dut ikastetxe honetan ematen erabiltzen den proiektuen bidezko metodologia. Proiektu hauek hizkuntza eta ingurunea gaiak lotzen dituzte eta era honetan inguruneako edukiak barneratzen dituzte hizkuntzako edukiekin batera.
Laburbiltzeko, praktiketako oso balorazio positiboarekin geratu naizela esan beharra daukat, bai oso ondo pasa izanagatik eta bai asko ikasi izanagatik ere.
